[02/01/2003]
Завершаны рэдызайн і рэканструкцыя сайта

12/05/2007 14:18

На думку еўрапейскіх букмекераў, прадстаўнік Беларусі на конкурсе "Еўрабачанне-2007" зойме трэцяе месца

Мінск, 12 мая. Напярэдадні фінальнага этапа конкурсу "Еўрабачанне-2007" найбуйнейшыя еўрапейскія букмекеры працягваюць прымаць стаўкі на яго вынік. Так, за некалькі гадзін да пачатку фіналу, паводле звестак буйнога спецыялізаванага партала www.oddschecker.com, стаўкі на перамогу Беларусі ў конкурсе вагаюцца ад 4,5 да 7 да аднаго. Па гэтым паказчыку Дзмітрый Калдун па-ранейшаму займае ў еўрапейскіх рэйтынгах трэцяе месца.

З учарашняга дня шанцы беларускага артыста на перамогу ў конкурсе крыху знізіліся: 11 мая некаторыя канторы прымалі стаўкі "на Калдуна" з разліку чатыры да аднаго.

Больш высокія шанцы на перамогу, на думку букмекераў, па-ранейшаму ў выканаўцаў з Украіны і Сербіі. Стаўкі на перамогу Веркі Сярдзючкі прымаюцца ўжо з разліку 2,5-3,5 да аднаго (учора даходзілі да 4 да аднаго), сербскай спявачкі Марыі Шэрыфавіч - 4-5 да аднаго (учора - 3,5-4,5 да аднаго). Замыкаюць пяцёрку фаварытаў Расія (5-10 да аднаго) і Латвія (4-13,5 да аднаго). Самыя высокія стаўкі прымаюцца на перамогу ў конкурсе Літвы - да 250 да аднаго.

Спецыялісты www.oddschecker.com прапаноўваюць азартным гульцам і аналітычныя заўвагі аб шанцах удзельнікаў. Напрыклад, пра Дзмітрыя Калдуна ў іх гаворыцца: "Малады спявак накшталт Рыкі Марціна, безумоўна, збярэ сваю аўдыторыю. Але выканаўцаў такога тыпу занадта шмат, таму ён наўрад ці ўзнімецца вышэй за трэцяе месца".

Нагадаем, што міжнародны конкурс песні "Еўрабачанне-2007" праходзіць у Хельсінкі. Паўфінал прайшоў у сталіцы Фінляндыі 10 мая, фінал адбудзецца сёння вечарам.

У конкурсе еўрапейскай песні Беларусь бярэ ўдзел чацвёрты раз. У 2004-2006 гадах трапіць у фінальную частку "Еўрабачання" беспаспяхова спрабавалі дуэт "Аляксандра і Канстанцін", Анжаліка Агурбаш і Паліна Смолава.

Юрый ДАВІДОЎСКІ, БелаПАН.