|
13/05/2007 17:45
Беларускую дэлегацыю на "Еўрабачанні-2007" у мінскім аэрапорце сустракалі з ваенным аркестрам і прыпеўкамі
Мінск, 13 мая. 13 мая беларуская дэлегацыя вярнулася ў Мінск з Хельсінкі, дзе мінулай ноччу прайшоў фінал конкурсу "Еўрабачанне-2007". Прыкладна ў 16.00 іх самалёт прызямліўся ў Нацыянальным аэрапорце "Мінск".
Дзмітрыя Калдуна і дэлегацыю, што яго суправаджала, супрацоўнікі Белтэлерадыёкампаніі, сябры і прыхільнікі сустракалі пад гукі ваеннага аркестра і прыпеўкі прадстаўнікоў БРСМ.
Кіраўнік Нацыянальнага тэлевізійнага праекта "Еўрафэст" Аляксандр Ціхановіч сказаў, што вельмі задаволены вынікамі ўдзелу Беларусі ў гэтым конкурсе, на якім Д.Калдун заняў шостае месца. Нагадаем, 21-гадовы беларус увайшоў у фінальную дзесятку з песняй "Work Your Magic" на верш Карэна Кавалерана і музыку Філіпа Кіркорава.
Начальнік галоўнага ідэалагічнага ўпраўлення Адміністрацыі прэзідэнта Алег Праляскоўскі зазначыў, што выхад у фінальную дзесятку - заслуга тых, хто быў задзейнічаны ў праекце, у тым ліку Белтэлерадыёкампаніі і асабіста Ф.Кіркорава.
Брат беларускага канкурсанта Георгій Калдун заявіў, што вынікі цяперашняга ўдзелу ў "Еўрабачанні" - "сапраўдны прарыў" для Беларусі. Паводле яго слоў, гэта сведчыць, што калі не шкадаваць грошай і ўкладваць іх у таленавітага выканаўцу, можна дасягнуць сапраўднага поспеху. На заўвагу журналістаў аб тым, што фінансавае забеспячэнне выканаўцы ад Беларусі Анжалікі Агурбаш у 2005 годзе таксама было вельмі сур'езным, але пры гэтым яна нават не выйшла ў фінал, Г.Калдун зазначыў, што цяперашні ўдзельнік - "больш фарматны" для гэтага песеннага конкурсу.
А.Ціхановіч паведаміў, што Д.Калдун быў і застаецца артыстам продзюсерскага цэнтра Віктара Дробыша, бо звязаны з ім кантрактам, і будзе далей працаваць згодна з планам гэтага расійскага цэнтра.
Паводле слоў А.Ціхановіча, 14 мая ў 21.40 на Першым тэлеканале пройдзе ток-шоу з удзелам Д.Калдуна і іншых членаў беларускай дэлегацыі на "Еўрабачанні".
Ігар ШАЎЧУК, БелаПАН.
|
Палітыка
тыдзень
